სოფლის განვითარების სააგენტომ „ტექნიკური დახმარების პროგრამაში“ განაცხადების მიღება დაიწყო.

როგორც უწყებაში აცხადებენ, თანადაფინანსების მოცულობა განსხვავებულია მიზნობრიობების მიხედვით და 6000 ლარიდან 40 000 ლარის ფარგლებში მერყეობს.

პროგრამა ითვალისწინებს თანადაფინანსებას შემდეგი  მიზნობრიობებით: სურსათის უვნებლობის მართვის საერთაშორისო სისტემების/ სტანდარტების დანერგვისა და სერტიფიცირების მომსახურების თანადაფინანსება; 

ბრენდირების  ან/და შეფუთვის დიზაინის შექმნის თანადაფინანსება;

სასოფლო-სამეურნეო კოოპერატივებისათვის, მათ მიერ წარმოებული პროდუქტის ბრენდირებისათვის/საბოლოო სასაქონლო სახის მისაცემად საჭირო აღჭურვილობის შეძენის თანადაფინანსება;

სასოფლო-სამეურნეო კოოპერატივის მეპაიესათვის ბუღალტერიის შემსწავლელი სასერტიფიკატო კურსის თანადაფინანსება;

სასოფლო-სამეურნეო კოოპერატივების მიერ სასაქონლო ნიშნების რეგისტრაციის ღირებულების თანადაფინანსება.

„სიახლეა ის, რომ წელს, პროგრამას ახალი მიზნობრიობა: უცხოელი კონსულტანტების მომსახურების თანადაფინანსება დაემატა. ტექნიკური დახმარების პროგრამაში განაცხადები მიიღება, როგორც ელექტრონულად, ელ.ფოსტის document@rda. gov. ge საშუალებით, ასევე, მატერიალურად - სოფლის განვითარების სააგენტოს ცენტრალურ ოფისში ან შესაბამის რეგიონულ სამსახურში“, - აცხადებენ სააგენტოში.